Matumizi ya dawa ya Cetirizine kwa madai ya kusaidia kubana uke yameibua mjadala kuhusu afya ya uzazi, huku wanawake wakitajwa kujaribu mbinu mbalimbali zisizothibitishwa kisayansi ili kuboresha hali ya sehemu zao za siri.

Madai hayo yamekuwa yakijadiliwa katika mitandao ya kijamii, yakizua maswali kuhusu usalama na ufanisi wa matumizi ya dawa hiyo kwa madhumuni ambayo haikuundwa kuyatimiza.

Cetirizine ni dawa inayopatikana katika kundi la antihistamine na hutumika kupunguza dalili za mzio, zikiwemo kupiga chafya, mafua yanayotokana na mzio, macho kuwasha na vipele vya ngozi.

Hata hivyo, dawa hiyo haijaidhinishwa kama tiba ya kubana uke au kuimarisha misuli ya sakafu ya nyonga.

Kwa mujibu wa taarifa za kitabibu, Cetirizine hufanya kazi kwa kuzuia athari za kemikali inayojulikana kama histamine, ambayo mwili huzalisha wakati wa mmenyuko wa mzio.

Miongoni mwa madhara yanayoweza kujitokeza baada ya matumizi yake ni kusinzia, uchovu, maumivu ya kichwa, kizunguzungu, kichefuchefu na ukavu wa kinywa.

Wataalamu wa afya pia wanasisitiza umuhimu wa kutofautisha kati ya ukavu wa uke na uimara wa misuli yake. Kupungua kwa unyevunyevu hakumaanishi kuwa misuli ya uke imeimarika au kubana zaidi.

Aidha, hakuna ushahidi wa kutosha wa kisayansi unaothibitisha kuwa Cetirizine inaweza kubana uke au kuimarisha misuli ya sakafu ya nyonga.

Wanawake wanashauriwa kuepuka kutumia dawa, kemikali au bidhaa ambazo hazijatengenezwa kwa matumizi ya sehemu za siri, hasa zinapoingizwa ndani ya uke, bila ushauri wa mtaalamu wa afya.

Uke una mfumo wake wa asili wa kujisafisha. Matumizi ya manukato, dawa za kuosha uke na bidhaa nyingine zisizofaa yanaweza kuvuruga uwiano wa bakteria wanaosaidia kulinda afya ya sehemu hiyo na kuongeza hatari ya muwasho au maambukizi.

Kwa wanawake wanaotaka kuimarisha misuli ya sakafu ya nyonga, mazoezi ya Kegel ni mojawapo ya mbinu zinazotambuliwa kitabibu kusaidia kuimarisha misuli hiyo. Hata hivyo, ushauri wa mtaalamu wa afya ni muhimu ili kuhakikisha mazoezi yanafanywa kwa usahihi.

Wanawake wanaopata ukavu wa uke, maumivu wakati wa tendo la ndoa, muwasho au mabadiliko yasiyo ya kawaida wanashauriwa kutafuta huduma za afya ili kubaini chanzo na kupata matibabu yanayofaa badala ya kutegemea mbinu zinazosambazwa mitandaoni.