Mgombea wa kiti cha ugavana wa Kaunti ya Kwale, Lung’anzi Chai Mangale, amekutana na Naibu Kiongozi wa Chama cha Orange Democratic Movement (ODM) na Gavana wa Kaunti ya Kisii, Simba Arati, katika mazungumzo yaliyolenga kuimarisha chama hicho katika eneo la Pwani.

Mazungumzo hayo yalijikita katika mikakati ya kukijenga chama cha ODM kuanzia ngazi ya mashinani, kuimarisha ushirikiano miongoni mwa wanachama na kupanua ushawishi wake wa kisiasa katika Kaunti ya Kwale.

Viongozi hao pia walijadili namna ya kukiimarisha chama hicho na kukiweka katika nafasi nzuri kuelekea Uchaguzi Mkuu wa mwaka 2027.

Mkutano huo unaashiria juhudi za kuimarisha misingi ya ODM katika Kaunti ya Kwale huku maandalizi ya kisiasa kuelekea uchaguzi mkuu ujao yakiendelea kushika kasi.